Вядомая беларуская бягуха Крысціна Ціманоўская, якая атрымала польскае грамадзянства і прадстаўляла Польшчу на міжнародных спаборніцтвах, расказала ў інтэрв'ю Interia Sport, што яе былы муж Арсеній Зданевіч, які таксама стаў грамадзянінам Польшчы пасля яе просьбы, цяпер жыве ў Беларусі і супрацоўнічае з мясцовым КДБ.
Паводле спартоўкі, у свой час яна асабіста звярнулася да прэзідэнта Польшчы з просьбай даць грамадзянства не толькі ёй, але і яе мужу, бо ён быў для яе важнай падтрымкай. Аднак цяпер мужчына, які знаходзіцца ў Беларусі, адмаўляецца ад польскага грамадзянства і заяўляе, што яно яму ніколі не было патрэбнае.
«Мне дзіўна, што ніхто ў Польшчы не займаецца тым, што наш грамадзянін супрацоўнічае з КДБ», — адзначыла Ціманоўская. Яна дадала, што пазбавіць былога мужа польскага грамадзянства цяпер вельмі складана, бо дакумент падпісваўся асабіста прэзідэнтам.
Спартоўка заявіла, што не адчувае страху, але не адчувае сябе камфортна ад думкі пра магчымае вяртанне былога мужа ў Польшчу: «Ніхто не ведае, што ён можа зрабіць, калі ўжо супрацоўнічае з КДБ».
Адказваючы на пытанне, ці супрацоўнічаў ён з КДБ яшчэ падчас іх шлюбу, Ціманоўская сказала: «Я так не думаю, але гэта невядома».
Цяпер Ціманоўская будуе новае жыццё з іншым мужчынам, які жыве ў ЗША, і сканцэнтраваная на трэніроўках і спартовай кар’еры.
Чытайце таксама
