Кітайская кампанія апублікавала вакансію, у якой у якасці бонусаў супрацоўнікам прапаноўваліся бясплатнае карыстанне прыбіральняй і ліфтам, а таксама адсутнасць платы за электраэнергію падчас перапрацовак. Прапанова выклікала хвалю кпінаў і крытыкі ў інтэрнэце, піша South China Morning Post.
Абвестка з’явілася на папулярнай старонцы ў сацсетках Workplace Slackers (амаль 4,4 млн падпісчыкаў). Хоць назва кампаніі і пасада не раскрываюцца, вядома, што вакансія звязаная з апрацоўкай замоваў, патрабуюцца ўвага да дэталяў, досвед і ўпэўненае валоданне Excel.
Сярод іншых «бонусаў» — пасляпаўдзённы чай, начныя перакусы, камандныя мерапрыемствы. Графік — 8 гадзін на дзень: з 9.00 да 18.00 або з 13.00 да 22.00 (з гадзінным перапынкам), зарплата на выпрабавальным тэрміне — 4000 юаняў (каля 550 даляраў), чатыры выходныя на месяц, Падвойная аплата ў святы і плюс 100 юаняў да акладу пасля года працы.
Але менавіта фармулёўкі пра «бясплатную прыбіральню» і «ліфт» выклікалі бурную рэакцыю. Карыстальнікі пісалі: «Гэта што, бонусы? Гэта базавыя рэчы!», «Кампанія лічыць сябе богам?», «Ёсць яшчэ куча падобных дзіўных вакансій, варта толькі пашукаць».
Усё гэта разгортваецца на фоне перагрэтага рынку працы ў Кітаі, дзе працаўнікі сутыкаюцца з нізкай аплатай, перапрацоўкамі (так званы графік 996 — з 9 раніцы да 9 вечара, 6 дзён на тыдзень), дрэннымі ўмовамі працы, дыскрымінацыяй па ўзросце (пасля 35 гадоў складана знайсці працу) і праблемамі з захаваннем сацыяльных гарантый. Асабліва складана даводзіцца маладым: сёлета на рынак выйдзе больш за 12 мільёнаў выпускнікоў, пры гэтым працоўных месцаў не хапае, адзначае выданне.