Рынак нерухомасці ў Мінску перажывае не самую актыўную вясну: колькасць угодаў зніжаецца, але цэны працягваюць упэўнена расці. Эксперты кажуць пра дэфіцыт даступнага жылля, асабліва аднапакаёвых кватэр, і зрушэнне попыту ў бок другаснага рынку і прыгарада.
Людзі пачалі часцей прыглядацца да жылля на другасным рынку
У сакавіку гэтага года колькасць угодаў аказалася меншай, чым у тым самым месяцы мінулага: 1540 у гэтым супраць 1810 у 2023-м. Пры гэтым цэны на квадратныя метры растуць далей, расказаў заснавальнік групы кампаній «Твая сталіца. Нерухомасць» Уладзімір Давідовіч у новым выпуску подкаста «Куфар. Нерухомасць».
Пры гэтым эксперт лічыць, што «трэнды пайшлі ў бок другаснага рынку», бо ў многіх выпадках гэта аказваецца больш выгадным.
— Другасны рынак больш дынамічны, чым першасны, ва ўсякім разе ў нас у Мінску. Бо асноўнае надвор’е робяць тры буйныя забудоўшчыкі, — дадае Уладзімір Давідовіч і ўдакладняе, што нават нягледзячы на тое, што летась актыўна раскуплялася не новае жыллё, там пастаянна з’яўляюцца новыя прапановы.
Што да перспектываў рынку, то многае будзе залежаць ад сітуацыі з замежнымі валютамі (далярам і расійскім рублём), а таксама ад крэдытных ставак.
— Калі ўсё застанецца так, як ёсць, на рынку нерухомасці, хутчэй за ўсё, будзе плато цэнавае. Сярэдняя тэмпература па бальніцы можа туды-сюды плаваць. Але гэта ў першую чаргу будзе залежаць ад структуры. Бо танных аб’ектаў стала менш, і цэны на іх ужо выраслі дастаткова. Тут рэсурс росту вычарпаны. Летась, уласна, быў такі перакос, што прэміум-сегмент адставаў у росце (за год ён толькі на 6% падаражэў). Цяпер ён будзе даганяць. І за кошт гэтага мы можам бачыць сярэдні рост цэн.
Рынак сутыкнуўся з новай рэальнасцю
Прыкметны спад колькасці ўгодаў пацвердзіў таксама намеснік начальніка аддзела кансалтынгу і аналітыкі агенцтва нерухомасці «Твая сталіца» Андрэй Чарнышоў. У красавіку іх было на 200 менш, чым у сакавіку.
Тым не менш цэны на кватэры растуць далей: +1,5% за месяц, +15% за год. Асабліва запатрабаваныя гатовыя да пражывання кватэры — яны даражэйшыя, але дазваляюць пазбегнуць укладанняў у рамонт.
— Цікава атрымліваецца, што ўгодаў становіцца менш, але цэны жылля па-ранейшаму растуць. Мы палічылі, што за красавік яны дадалі 1,5% адносна сакавіка. Вядома, тут трэба адзначыць, што павышэнне могуць сабе дазволіць ўласнікі больш дагледжаных кватэр. У той час як кватэры, што патрабуюць значнага рамонту, паказваюць па цэнах невялікі, але ўсё ж мінус, — заўважыў эксперт.
На рынку назіраецца дэфіцыт аднапакаёвых кватэр і жылля з добрым рамонтам. Попыт застаецца высокім, але прапанова змяншаецца, асабліва ў бюджэтным сегменце. Многія ўгоды праходзяць яшчэ да з’яўлення абвестак. Маладыя пакупнікі аддаюць перавагу новабудоўлям і раёнам з развітай інфраструктурай, а цэнтр горада страчвае папулярнасць.
Сярэдні кошт «квадрата» ў Менску вырас да 1680 даляраў, і многія, не вытрымаўшы коштаў, сыходзяць у прыгарады — Заслаўе, Калодзішчы, Бараўляны. Расце і сярэдні памер іпатэчнага крэдыту — з 112 да 131 тысячы рублёў за год.
Эксперты лічаць, што попыт застанецца на цяперашнім узроўні, але рызыкі інвеставання ў жыллё павялічваюцца. Хуткага зніжэння цэн чакаць не варта, але магчымая паступовая карэкцыя. На фоне валютных ваганняў і росту цэн пакупнікі ўсё часцей шукаюць надзейныя варыянты — як па цане, так і па якасці жылля.
Цэны на аднапакаёўкі б’юць рэкорды
Паводле інфармацыі кіраўніка Greenman Realty Group Аляксандра Грынмана, красавік не апраўдаў аптымістычных чаканняў — у адрозненне ад ранейшых гадоў, калі гэты месяц дэманстраваў рэкордныя продажы, сёлета такіх вынікаў дасягнуць не ўдалося.
Асноўная прычына — востры дэфіцыт аднапакаёвых кватэр. Калі такія аб’екты і трапляюцца, то каштуюць яны рэкордна дорага — на максімумах за 10−12 гадоў. Гэта аўтаматычна штурхае ўверх цэны на двух- і трохпакаёвае жыллё.
Уласнікі бачаць, што аднапакаёўкі амаль зраўняліся ў цане з двухпакаёўкамі, і пачынаюць павышаць цэны на свае кватэры. Аднак такая стратэгія не дапамагае паскорыць продаж.
Напрыклад, яшчэ пару гадоў таму трохпакаёўкі з базавым аздабленнем у дамах пасля 2000 года можна было купіць значна танней за 100 тыс. даляраў — і нават з рамонтам. Цяпер жа такія кватэры выстаўляюцца мінімум за 100 тыс.
Чытайце таксама
