Выступаючы на адкрыцці Міжнароднага выставачнага цэнтра ў Мінску, Лукашэнка прызнаў, што ў краіне існуе дэфіцыт бульбы. Яго ён патлумачыў жаданнем фермераў падзарабіць і прапанаваў беларусам сваю «хітрую сялянскую задуму».
Лукашэнка дэфіцыт бульбы патлумачыў тым, што грамадзяне хочуць купляць прадукцыю па нізкіх цэнах, а фермеры, наадварот, зацікаўленыя прадаць свой тавар даражэй. І так выйшла, што ў Расіі цэны на тую ж бульбу аказаліся ў некалькі разоў вышэйшымі, чым у Беларусі. Таму вытворцы арыентаваліся на расійскі рынак.
«Вы думаеце, што ў Расіі і іншых краінах, дзе сёння дэфіцыт бульбы, заўтра гэты дэфіцыт знікне? Не! Ён будзе яшчэ некалькі гадоў. Дык давайце, кажу, у нас ёсць насенная бульба, яшчэ месяц адмучымся, некаму яна можа не падабацца, але мы яе пасеем. Атрымаем у дзесяць разоў больш, чым пасеялі, і потым прададзім. Прададзім па добрай цане.
Гэта такая хітрая, можа быць, сялянская задума», — агучыў ён свой план.
Лукашэнка таксама запэўніў усіх, хто «перажывае за бульбу», што без яе краіна не застанецца:
«Вось даручана Камітэту дзяржаўнага кантролю разабрацца з сітуацыяй у гандлёвых сетках і паглядзець, чаго нам не хапае».
Нагадаем, беларусы вось ужо некалькі месяцаў скардзяцца на якасць гэтага прадукту ў крамах і яго цэны. Пачаліся праблемы ў лютым (хоць чыноўнікі сцвярджаюць адваротнае). Мінсельгасхарч і МАРГ настойваюць, што ў крамах бульба ёсць і «турбавацца наконт якасці прадукту не варта». Аднак у сваіх кабінетах праблему абмяркоўваюць на самым высокім узроўні. Між тым беларусы пачалі скардзіцца на якасць і цану бульбы ў TikTok, у тым ліку звяртаючыся да Лукашэнкі.
