Падчас выступлення на ўрачыстым мерапрыемстве ў Міжнародным выставачным цэнтры ў Мінску Аляксандр Лукашэнка прызнаў, што «крыху затрымаўся» ва ўладзе, аднак заклікаў грамадзян «пацярпець», падкрэсліўшы важнасць прысутнасці дасведчаных палітыкаў побач з новым пакаленнем кіраўнікоў.
«Як вам я абяцаў — фактычна новае пакаленне прыведзенае да ўлады. Ну, я трошкі затрымаўся, але пацярпіце. Мусяць жа быць і дасведчаныя людзі. У нас яны ёсць. Але моладзь прыйшла. Вось вы паглядзіце і зробіце выснову, на што здольная нашая моладзь. Ну, як моладзь? Новае пакаленне, наступнае пакаленне, 50 і больш. Яно ўжо не такая і моладзь», — сказаў Лукашэнка.
Палітык выказаў упэўненасць, што перад ім стаяць людзі, якія хочуць захаваць краіну «ўжо нават не столькі для сябе, колькі для дзяцей».
Закрануўшы тэму бяспекі, Лукашэнка заявіў, што Беларусь па-ранейшаму застаецца «спакойнай, мірнай, добрай краінай» на фоне вайны ля межаў.
«Беспілотнікі не лётаюць. А калі і лётаюць — праз памылку да нас залятаюць. Вайна ідзе побач. <…> Вакол сумятня вялікая, вельмі вялікая. Гэта тое, што вы бачыце, а тое, чаго вы не бачыце — шмат нестабільных кропак, якія могуць атрымаць сваё развіццё. Для нас важна і для мяне — не дапусціць гэтага развіцця неспрыяльнага для Беларусі. Трэба абараніць сваю краіну», — падсумаваў палітык.