Міністэрства эканомікі вынесла на грамадскае абмеркаванне законапраект, якім хочуць унесці змяненні для антыкрызісных кіраўнікоў. Так, у іх працу збіраюцца ўвесці абмежаванні — забараніць займацца гэтай дзейнасцю, калі былі «палітычныя» парушэнні па КаАП.
Гаворка пра тых антыкрызісных кіраўнікоў, якіх эканамічныя суды прызначаюць па справах пра неплацежаздольнасць ці банкруцтва кампаній. Як удакладняюць у абгрунтаванні да законапраекта, новаўвядзенні хочуць укараніць для таго, каб на рынку былі «толькі кваліфікаваныя спецыялісты са станоўчым стаўленнем да дзяржаўных і грамадскіх інстытутаў, канстытуцыйнага ладу».
Сярод іншага чыноўнікі ўдакладняюць, праз што могуць адклікаць атэстат кіраўніка. «Змяняюцца патрабаванні да прэтэндэнтаў для праходжання атэстацыі і атрымання атэстата кіраўніка», — гаворыцца ў законапраекце.
Сярод новых патрабаванняў хочуць прапісаць, што такія кіраўнікі не змогуць атрымаць атэстат на працу, калі знаходзяцца пад судом ці следствам, а таксама прыцягваліся па «адміністратыўцы» паводле артыкулаў 19.10, 19.11, 24.1−24.3, 24.23 КаАП. «Але і не быць вызваленым ад адміністрацыйнай адказнасці па названых артыкулах з вынясеннем папярэджання», — гаворыцца ў законапраекце.
Да прыкладу, 24.23 КаАП прадугледжвае «парушэнне парадку арганізацыі ці правядзення масавых мерапрыемстваў».
Грамадскае абмеркаванне працягнецца да 23 траўня.
Чытайце таксама
