Палітзняволенага 55-гадовага грамадзяніна Украіны Юрыя Бандарэнку затрымалі год таму — пятага траўня 2024 года. Яго абвінавацілі паводле арт. 368 Крымінальнага кодэкса (абраза Лукашэнкі) і асудзілі да аднаго года і шасці месяцаў калоніі. «Вясна» дазналася, за што менавіта асудзілі ўкраінца ў Беларусі.
10 ліпеня 2024 года ў судзе Бабруйскага раёна і г. Бабруйска Юрыя Бандарэнку асудзілі паводле ч. 1 арт. 368 КК (публічная абраза прэзідэнта) да аднаго года і шасці месяцаў калоніі агульнага рэжыму. Прысуд вынес суддзя Андрэй Літвін, а дзяржаўнае абвінавачванне падтрымліваў І. Хадневіч. Справу разглядалі ў закрытым рэжыме.
Праваабаронцам «Вясны» стала вядома, што Юрый Бандарэнка родам з Крапіўніцкага. У яго ёсць дзіцё. Пасля затрымання яго адразу змясцілі пад варту ў СІЗА № 4 у Магілёве.
Паводле абвінавачвання, раніцай чацвёртага траўня Бандарэнка каля крамы «Транзіт» выказаўся ў прысутнасці іншых грамадзян у непрыстойнай форме пра Лукашэнку. Згодна версіі абвінавачвання, матывам украінца стаў «падтрымка ідэй сацыяльнай нецярпімасці да прадстаўнікоў улады Рэспублікі Беларусь і адкрытая праява непрыязнасці да яе». Адзін з прысутных звярнуўся ў міліцыю і нават прадаставіў фотаздымак машыны, на якой з’ехаў Юрый Бандарэнка са сваім таварышчам. На наступны дзень украінца затрымалі па абвінавачванні ў абразе Лукашэнкі.
На судзе Бандарэнка прызнаў віну. На пасяджэнні дапыталі сведку, які і данёс на ўкраінца. Адзначым, што Юрыя асудзілі фактычна толькі на падставе даносу. У якасці доказаў вінаватасці Юрыя сталі звесткі і запіс тэлефоннага званка ў міліцыю бабруйчаніна, відэазапіс з крамы «Транзіт», які пацвярджае толькі знаходжанне Юрыя Бандарэнкі каля гэтай крамы, фотавыява машыны Бандарэнкі, на якой ён з’ехаў, з тэлефона даносчыка. Аўдыёзапісаў і відэазапісаў, якія бы падцвярджалі выказванне ўкраінцам абразаў у матэрыялах справы няма.