У Беларусі збіраюцца ўвесці змяненні па выдаванні крэдытаў насельніцтву. Адпаведны законапраект знаходзіцца на разглядзе ў парламенце.
Законапраектам хочуць забараніць індывідуальным прадпрымальнікам і юрыдычным асобам, якія не займаюцца мікрафінансавай дзейнасцю, выдаваць крэдыты фізічным асобам. Выключэнне хочуць зрабіць для пазык, якія наймальнікі выдаюць сваім работнікам.
Таксама чыноўнікі плануюць увесці забарону на выдаванне пазык пад заклад адзінага жылога дома або кватэры.
«Забараняецца выкарыстанне ў рэкламе рэкламадаўцаў, якія не з’яўляюцца мікрафінансавымі арганізацыямі, у тым ліку ў іх назвах, словаў „пазыка“, „мікрапазыка“, „мікрафінансаванне“, „грошы ў доўг“ або вытворных ад гэтых словаў», — паведамляюць у парламенце пра яшчэ адно магчымае новаўвядзенне.
Што могуць змяніць для тых, хто бярэ ў доўг у іншых людзей
У законапраекце таксама прапісалі забарону на тое, каб у дамовах пазыкі паміж фізічнымі асобамі сумы прапісвалі ў замежнай валюце. Гэтае патрабаванне не датычыць ІП. Яшчэ адно выключэнне — такое пагадненне паміж блізкімі сваякамі. Гэта сярод іншага муж і жонка, бацькі, дзеці, родныя браты і сёстры, бабулі і дзядулі.
Прасцей кажучы, калі вы дасце ў доўг камусьці са сваіх сяброў і аформіце дамову пазыкі, то сумы ў ім пазначыць у замежнай валюце будзе нельга, калі змяненні ў выніку зацвердзяць.
Законапраект таксама прадугледжвае абмежаванні што да памераў працэнтаў і няўстойкі (штрафу, пені), якія можна спагнаць па дамовах пазыкі паміж фізічнымі асобамі.
Як удакладняюць у парламенце, законапраект падрыхтавалі для таго, каб забяспечыць дадатковую абарону правоў і маёмасных інтарэсаў беларусаў.
Нагадаем, у Нацбанка выклікаюць асцярогі высокія тэмпы росту крэдытавання насельніцтва. Рэгулятар лічыць, што гэта «можа стварыць пагрозу для фінансавай і цэнавай стабільнасці».
21 сакавіка кіраўнік Нацбанка Раман Галоўчанка заявіў, што рэгулятар занепакоены ростам спажывецкага крэдытавання, якое часам ідзе на шкоду фінансаванню бізнесу, і гатовы ўмяшацца ў сітуацыю, калі гэта спатрэбіцца.
Эксперты тым часам адзначаюць перакосы ў эканоміцы, у тым ліку прыхаваную інфляцыю, і бачаць перадумовы для аслаблення нацыянальнай валюты.
Чытайце таксама
