Жыхарка беларускай сталіцы стала інтэрнэт-зоркай, пасля таго як зрабіла заказ на адным з папулярных маркетплэйсаў. Аднак слава аказалася з непрыемным адценнем: амаль усе каментатары абвінавацілі беларуску ў «спажывецкім тэрарызме», піша Tochka.by.
Попытаемся выбрать себе купальник 34 товара 🤪 pic.twitter.com/s7mHakSsLO
— Фея (@classique_bitch) May 9, 2025
Дзяўчына з нікам Фея расказала ў сацсетцы X, што аформіла на Wildberries замову на 34 купальнікі, каб выбраць патрэбны. Сума атрымалася вялікая — 3 078,2 рубля.
А далей — класіка: яе пост ініцыяваў гучны скандал, а карыстальнікі Х падзяліліся на два варожыя лагеры. Адны назвалі ўчынак, мякка кажучы, недапушчальным, іншыя адстойваюць правы.
Першымі аб’явіліся хейтары: каментатары абвінавацілі мінчанку ў тым, што яна ператварае жыццё работнікаў пункта выдачы заказаў (ПВЗ) у пекла. Бо ім трэба будзе перапакаваць і аформіць вяртанне на ўсе вырабы.
Часцей за ўсё аўтарцы паста задавалі пытанне, навошта выбіраць з такой вялікай колькасці купальнікаў. А яшчэ яе прасілі выкласці «топ фота» па выніках прымеркі.
Некаторыя не здагадаліся паглядзець, што дзяўчына жыве ў Беларусі, а не ў РФ, і абвінавацілі яе ў хлусні, заяўляючы, што немагчыма замовіць 34 купальнікі на 3000 расійскіх рублёў.
Фея адразу чытала каментары і адказвала крытыкам (пунктуацыя аўтаркі захаваная):
«Дзякуй богу ў Сусвеце не існуе правіла, па якім я магу выбіраць толькі з 3 купальнікаў, а не з 15. Я магу выбіраць усё, што прадстаўленае для мяне ў краме. Вы, дарэчы, таксама».
Аднак былі і тыя, хто стаў на абарону дзяўчыны.
«Лепш паехаць у краму, дзе прадавачкі 12 гадзін на нагах і развешваюць рэчы з прымерачнай, большую частку якіх прымяраюць па сто разоў і ніхто не купляе», — пісалі юзеры.
А хтосьці звярнуў увагу і на карэктнасць памернай сеткі, якой карыстаюцца прадаўцы на WB.
«<…> з нагоды 34 купальнікаў мяне больш за ўсё здзіўляе нуль заклікаў да прадаўцоў адзення карэктна паказваць памерную сетку ў абвестках, фатаграфаваць рэчы на мадэлях рознага целаскладу (асабліва калі памерная сетка ад 42 да 60) і не выкарыстоўваць ШІ».
У выніку пост за лічаныя дні сабраў ужо 1,6 млн праглядаў. Характэрна, што ў Феі пры гэтым усяго 270 падпісчыкаў.