Начныя замаразкі, дажджы і навальніцы чакаюцца ў Беларусі 15−17 траўня. На чацвер абвешчаны жоўты ўзровень небяспекі, паведамілі ў Белгідрамеце.
У чацвер, 15 траўня, у Беларусі будзе воблачна з праясненнямі, на большай частцы тэрыторыі чакаюцца дажджы, днём месцамі прагрымяць навальніцы. Уначы будзе +1…7°С, па паўднёвым усходзе Беларусі да +10°С. Максімальная тэмпература днём +7…13°С, па паўднёвым усходзе — да +15°С.
На чацвер абвешчаны жоўты ўзровень небяспекі праз навальніцы. Акрамя таго, месцамі ў паўночна-заходніх раёнах краіны чакаюцца замаразкі 0…-2°С — гэта класіфікуецца як неспрыяльная гідраметэаралагічная з’ява.
Замаразкі чакаюцца і 16 траўня — месцамі па краіне ноччу будзе 0… -3°С. На большай частцы тэрыторыі пройдуць дажджы, днём магчымыя навальніцы. У сярэднім ноччу будзе +1…6°С, максімальная тэмпература паветра днём +7…14°С.
У суботу, 17 траўня, ноччу месцамі, днём на большай частцы тэрыторыі пройдуць кароткачасовыя дажджы. Удзень у асобных раёнах магчымыя навальніцы. Тэмпература паветра мінімальная ноччу +1…6°C, максімальная днём +9…15°С.
