Зняволеных з віцебскай калоніі № 3 пачалі масава пераводзіць у іншыя калоніі. Пра гэта паведамляе праваабарончы цэнтр «Вясна».
Перавод асуджаных у іншыя калоніі звязаны з правядзеннем рамонтных работ у прамысловай зоне «Віцьбы» — на прадпрыемствах прамзоны ПК-3 ужо вядуцца рамонтныя работы. Большасць зняволеных перавялі ў ПК-17 у Шклове, ПК-15 у Магілёве і ПК-22 «Воўчыя норы».
Паводле звестак праваабаронцаў, у «Віцьбе» ўтрымліваюцца 75 палітвязняў.
«Вясна» просіць напісаць @Viasnainfo, калі вам вядомыя прозвішчы пераведзеных з «Віцьбы» ў іншыя месцы палітычных вязняў.
Раней у размове з «Люстэркам» у «Вясне» расказвалі, што атрымаць кансультацыю можна, звярнуўшыся ў акаўнт @ViasnaSOS.
— Хочам нагадаць, з нашага боку ўсё канфідэнцыйна. У нас не было нейкіх праблем з бяспекай звестак людзей, якія да нас звярталіся, — запэўнілі ў праваабарончай арганізацыі.
