Ва Украіне загінуў камандзір 76-й гвардзейскай дэсантна-штурмавой дывізіі ПДВ (вядомая таксама як Пскоўская дывізія) палкоўнік Абдулазіз Шыхабідаў. Уладзімір Пуцін прызначыў яго на гэтую пасаду толькі ў сярэдзіне сакавіка. Паводле звестак Z-паблікаў, Шыхабідава ўжо пахавалі на Траякураўскіх могілках у Маскве, звярнула ўвагу «Агентство».
Пра гібель ураджэнца Дагестана палкоўніка Абдулазіза Шыхабідава яшчэ ў панядзелак пачалі паведамляць школы гэтага расійскага рэгіёна — у іх прайшлі «пазаўрочныя мерапрыемствы, прымеркаваныя да ўвекавечання памяці героя, які загінуў пры абароне Радзімы».
Z-паблікі напісалі, што развітанне з камандзірам прайшло на Траякураўскіх могілках у Маскве.
76-я гвардзейская дэсантна-штурмавая дывізія ПДВ удзельнічае ў вайне з Украінай з 2014 года. Яе байцы бралі ўдзел у захопе Крыма, а таксама ў баях у Данецкай вобласці, пра што стала вядома пасля масавых пахаванняў дэсантнікаў. Пасля поўнамаштабнага ўварвання ва Украіну ў лютым 2022 года менавіта Пскоўская дывізія стаяла ў Бучы. Расследаванне агенцтва Reuters пацвярджала сувязь вайскоўцаў падраздзялення з актамі гвалту супраць мірных жыхароў.
10 сакавіка Пуцін павысіў ранейшага камандзіра дывізіі генерал-маёра Сяргея Чубарыкіна да камандуючага ПДВ, а на яго месца прызначыў Шыхабідава. Да Украіны Шыхабідаў удзельнічаў у баявых дзеяннях у Паўднёвай Асеціі і Сірыі. Узнагароджаны ордэнамі і медалямі.
Нагадаем, Руская служба Бі-бі-сі і «Медыязона» высветлілі з адкрытых крыніц, што Расія з пачатку поўнамаштабнага ўварвання страціла ва Украіне 5826 элітных вайсковых спецыялістаў.
