Індыя і Пакістан правялі адзін з самых маштабных і працяглых паветраных баёў у найноўшай гісторыі авіяцыі — з удзелам 125 знішчальнікаў агулам, паведамляе CNN са спасылкай на высокапастаўленага прадстаўніка службы бяспекі Пакістана.
Паводле крыніцы ў Ісламабадзе, паветраны бой паміж пакістанскімі і індыйскімі знішчальнікамі ў ноч на 7 траўня стаў адной з самых маштабных і працяглых «сабачых боек» (dog fight, у вайсковай тэрміналогіі — паветраны бой паміж знішчальнікамі, які праводзіцца на блізкай адлегласці) у найноўшай гісторыі авіяцыі.
Паводле суразмоўцы, у баі ўдзельнічалі агулам 125 знішчальнікаў, ён доўжыўся больш за гадзіну. Пры гэтым ні адзін з бакоў не перасякаў паветранай мяжы праціўніка: ракеты запускаліся з адлегласці, што перавышае 160 кіламетраў.
Адзначаецца, што ні Індыя, ні Пакістан не наважыліся адправіць сваіх пілотаў у паветраную прастору праціўніка праз траўматычны досвед 2019 года — тады індыйскі самалёт быў збіты над тэрыторыяй Пакістана, лётчык трапіў у палон і быў паказаны па тэлебачанні, што стала нацыянальным прыніжэннем для Індыі. Цяпер абодва бакі хацелі гэтага ўнікнуць, растлумачыў суразмоўца.
У некаторых выпадках, паводле яго словаў, індыйскім ВПС даводзілася паўторна заходзіць на цэлі. Пакістанскі бок стараўся загадзя папярэджваць мірных жыхароў у раёнах, якія маглі зазнаць удары, дзякуючы гэтаму вайскоўцам удалося звесці страты сярод цывільнага насельніцтва да мінімуму.
Нагадаем, у ноч на 7 траўня Індыя ў адказ на расстрэл турыстаў у Кашміры нанесла ракетныя ўдары па некалькіх цэлях у Пакістане. Пакістан заявіў, што ў адказ збіў пяць індыйскіх знішчальнікаў і знішчыў штаб армейскай брыгады.
Як перадавала агенцтва Reuters са спасылкай на прэс-сакратара Узброеных сіл Пакістана, у выніку ўдараў ВПС Індыі па Пакістане загінулі 26 чалавек, яшчэ 46 атрымалі раненні.