Прэзідэнт Расіі Уладзімір Пуцін не возьме ўдзелу ў перамовах з Украінай, якія пройдуць у Стамбуле. Пра гэта заявіў афіцыйны прадстаўнік Крамля Дзмітрый Пяскоў.
Як піша ТАСС, на пытанне журналіста CNN пра магчымасць прысутнасці Пуціна ў Турцыі Пяскоў сказаў «не».
Між тым прэзідэнт Украіны Уладзімір Зяленскі прыляцеў у Анкару. Пасля прызямлення самалёта проста на ўзлётным полі ён даў невялікую прэс-канферэнцыю.
Перш за ўсё ён падзякаваў прэзідэнту Турцыі Эрдагану за арганізацыю сустрэчы і магчымасць прамых перамоваў з Расіяй.
Прэзідэнт Украіны паведаміў, што першы пункт у яго праграме — сустрэча з кіраўніком Турцыі, і не выключыў, што яна будзе доўжыцца некалькі гадзін. Зяленскі падкрэсліў, што таксама застаецца ў кантакце з амерыканскім бокам.
— Дэлегацыя ў нас на самым высокім узроўні. МЗС, мой Офіс, вайскоўцы, нашыя разведкі, прадстаўнікі ўсіх нашых разведак, дарэчы, для таго, каб прымаць любыя рашэнні да чаканага справядлівага міру, — расказаў Зяленскі пра склад украінскай дэлегацыі.
Ён адзначыў, што ўкраінскі і амерыканскі бакі прадстаўленыя на найвышэйшым узроўні, у той час як расійскі — «на бутафорскім».
— Падумаем, што будзем рабіць, якімі будуць нашыя крокі пасля размовы з прэзідэнтам Эрдаганам, — паведаміў Зяленскі, адзначыўшы, што яшчэ неабходна зразумець, ці ёсць у расійскай дэлегацыі паўнамоцтвы прымаць хоць нейкія рашэнні.
«Навошта яму ехаць, калі я не еду?»
Раней сёння прэзідэнт ЗША Дональд Трамп, які знаходзіцца з візітам у Катары, заявіў, што ўсё яшчэ можа паехаць у Турцыю, калі першыя прамыя мірныя перамовы паміж Расіяй і Украінай прасунуцца.
«Ведаеце, калі б нешта здарылася, я б паехаў у пятніцу», — сказаў Трамп.
У адказ на пытанне журналістаў пра тое, ці расчараваны ён непрыездам Пуціна, прэзідэнт ЗША заявіў, што чакаў гэтага.
«Наогул я казаў: навошта яму ехаць, калі я не еду? А паколькі я не планаваў ехаць, то сказаў: „Я не думаю, што ён [Пуцін] паедзе“, — і высветлілася, што так яно і ёсць. <…> Я не думаю, што для Пуціна было магчымым прыехаць, калі я не еду», — заявіў Трамп.
Нагадаем, як раней паведамлялі расійскія СМІ, старт перамоваў быў запланаваны арыентавана на 10.00 паводле мясцовага часу (супадае з мінскім). Аднак ва Украіне заявілі, што названы час не адпавядае рэчаіснасці.
Афіцыйная прадстаўніца МЗС Расіі Марыя Захарава тым часам паведаміла, што з ініцыятывы турэцкага боку перамовы Масквы і Кіева перанеслі на другую палову дня.
Аднак крыніца Бі-бі-сі ў МЗС Турцыі заявіла, што сустрэча дэлегацый Расіі і Украіны ў Стамбуле пакуль не запланаваная на нейкі канкрэтны час, у сувязі з гэтым пытанне пра яе перанос не падымалася.
