Прэзідэнт ЗША Дональд Трамп падчас тэлефоннай размовы з прэзідэнтам РФ Уладзімірам Пуціным спытаў, калі скончыцца «кровапраліцце» ва Украіне, і папярэдзіў, што можа адмовіцца ад урэгулявання канфлікту, калі ў выніку перамоваў не будзе «істотнага прагрэсу». Як піша The Moscow Times, пра гэта Трамп расказаў, размаўляючы з журналістамі ў Белым доме.
«Я сказаў яму: трэба ісці далей. І я таксама сказаў: калі я палічу, што вы не можаце гэтага зрабіць, я адыду [ад працэсу ўрэгулявання], бо ну што можна зрабіць», — расказаў Трамп журналістам.
Прэзідэнт ЗША адзначыў, што ў яго ёсць «чырвоная лінія», пасля якой ён вырашыць адмовіцца ад перамоваў, але не назваў яе. Паводле яго, у такой сітуацыі ЗША саступяць сваю ролю ва ўрэгуляванні Еўропе.
«Так, гэта ёсць у маёй галаве, але гэта не тое, што я збіраюся абвяшчаць… Бо гэта нашая праца. Гэта не мая вайна. Я маю на ўвазе, мы ўвязаліся ў тое, у што не мусілі ўвязвацца… Так што я думаю, што так, я б сказаў, што ў мяне ёсць пэўная лінія. Але я не хачу казаць, што гэта за лінія. Бо, па-мойму, гэта яшчэ больш ускладніць перамовы», — заявіў ён.
Пры гэтым Трамп выказаў упэўненасць, што пасля размовы з Пуціным будуць істотныя змены.
«Задзейнічаныя вялікія эга, але я думаю, што нешта адбудзецца», — сказаў ён. Трамп паўтарыў, што не будзе ўводзіць санкцыі супраць Расіі, бо ёсць шанец на прагрэс у пытанні спынення вайны.
«Але можа надысці час, калі гэта адбудзецца», — дадаў Трамп.
Тэлефонная размова Трампа і Пуціна адбылася ўвечары 19 траўня. Пасля яе Трамп заявіў, што Расія і Украіна «неадкладна» пачнуць перамовы, дадаўшы, што ўмовы для гэтага павінныя ўзгадніць самі бакі, бо «яны ведаюць дэталі», якіх ніхто больш не ведае. Пуцін у сваю чаргу заявіў пра гатоўнасць працаваць з Украінай над мемарандумам пра мірную дамову, у якой будуць акрэсленыя прынцыпы ўрэгулявання, часавыя рамкі заключэння мірнага пагаднення, а таксама ўмовы спынення агню.
Прэзідэнт Украіны Уладзімір Зяленскі дапусціў падпісанне такога мемарандума. Паводле яго, Кіеў будзе чакаць ад Масквы расійскага варыянта дакумента і збіраецца падрыхтаваць сваю версію. Таксама Зяленскі заявіў, што Кіеў разглядае магчымасць новай сустрэчы ўсіх удзельнікаў працэсу ўрэгулявання ў Турцыі, Швейцарыі ці Ватыкане. Пры гэтым Зяленскі падкрэсліў, што Украіна не пойдзе на кампрамісы, звязаныя з вывадам сваіх войскаў з уласнай тэрыторыі.
