Не менш за 200 тысяч украінцаў і яшчэ сотні тысяч выхадцаў з іншых краін, дзе вядуцца ўзброеныя канфлікты, трапілі пад дзеянне праграмы Белага дома пра «самадэпартацыю» ў абмен на ўзнагароду ў 1 тысячу даляраў, піша Washington Post (WP) са спасылкай на дакументы.
Паводле звестак газеты, адміністрацыя Трампа хоча, каб акрамя ўкраінцаў «самадэпартаваліся» 500 тысяч гаіцян, а таксама афганцы.
У Белым доме адмовіліся каментаваць газеце інфармацыю пра высылку ўкраінцаў, падкрэсліўшы толькі, што разам з Міністэрствам унутранай бяспекі (DHS) шукаюць спосабы «фінансавай матывацыі» для мігрантаў, каб яны пакінулі ЗША добраахвотна.
Прэс-сакратарка Міністэрства ўнутранай бяспекі Трыша Маклафлін заявіла, што кіраўніца ведамства Крысці Ноэм пакуль не прыняла канчатковага рашэння пра лёс часовага абароненага статусу (TPS), які распаўсюджваецца на ўкраінцаў і гаіцян. Статус дазваляў ім пазбягаць высылкі ў свае краіны: украінцам — з 2022 года, а гаіцянам — з 2010-га, калі на востраве адбыўся землятрус.